咁多位大家好~咁我之前貼好多貼都係關於彩豐行既~我係咁話彩豐行既產品唔錯唔錯~
但係其實我已經覺得自己有D似彩豐行打手(SALES)~又或者比人覺得我信唔信得過~
因為我係咁介紹都係好野咁~連我自己都覺得自己有D似SALES~咁我今個帖主要係分析
番一下彩豐行部分我用過既產品~同埋一支OLAY磨砂~再推薦一D彩豐行產品~首先我唔知
沐浴露算唔算係呢個版啦~咁唔算就當BONUS啦~
所有無標示的產品均為 彩豐行 的產品
----------------------------------------------
分析深層:
A1133 礦物泥排毒去油面膜
呢隻都係大家講個D咩泥咩泥~呢隻只係比較平既版本~當然平野唔一定唔係好野~但係呢隻野真係唔好~
點解咁講~通常我知既泥都係有小小深層~呢隻野真係無深層既~只係得去油呢個效果~去油的的確確真係
去到~但係如果只係去油~我不如用其他產品啦~人地深層去油一次做哂啦~而且呢支野最大問題就係難洗~
你一係就沖涼之前用~如果唔係搽面跟住等完10分鐘再洗~哇~難洗到你~一定洗得唔乾淨~到時反而堵塞毛孔
又出暗瘡~
解決產品:
A78 深層潔淨補濕面膜
呢隻深層我真係好推薦比任何一個人用~之前我有個黑頭POST~話個粉刺速淨MP3有3支野~
第1支就係深層~但係個支深層講真真係深乜鬼呀又~我用呢隻面膜再用個撕既面膜仲好效果啦~呢隻
第一就係平~100ML 28蚊~480ml 75蚊~第二就係效果同好多大牌子相若~好多產品賣
既係牌子~者係成本真係唔貴~但係個牌子名貴呀~所以有時平野真係有好野~呢隻野我full左12分鐘
之後~洗面~跟住成堆白頭係哂上面等緊我去處理~
------------------------------------------------
分析磨砂:
注意:此項並沒有提供任何推薦產品,因為本人未搵到平靚正既產品
OLAY產品:OLAY磨砂去黑頭深層潔面乳
好多牌子明明無深層就係要加個深層落去~呢隻野深乜鬼層呀~真係無深層可言~深層呢方面都無野好講~
但係呢隻野既磨砂真係唔錯~可以當磨砂用啦~因為佢係潔面乳~所以都幾溫和下~係萬寧都有得買呢隻產品~
但係千其唔好當佢深層黎用~同埋佢磨砂粒子都係幾好既~
A1122 控油磨砂潔面啫喱[起泡]
第一呢支野既磨砂硬到爆炸~真係好硬~第二~呢隻野話你控油又唔係控到~話你唔控油你又唔係控唔到~
控油就控油~控到小小油~控完跟住15MINS之後又爆發囉~跟住我宜家激鬼氣唔鬼用佢磨砂~我好想
丟左佢~但係我係一個唔浪費產品既人士~最後~我囉黎磨我既身體~但係講真個句~如果我囉黎磨我身體~
又唔夠dove隻身體磨砂好~我真係唔知你有乜用~
----------------------------------------------
分析補水產品:
A1870 12杯水滋潤啫喱
其實呢隻野應該好多人都聽過~簡稱12杯水~我初初以為乜野黎~以為一日要飲12杯水~
咁樣我見到呢樣野我自然就估佢個名就真係有12杯水咁補水既~者係好明顯呢隻野係超級補水~
相對價錢真係幾抵呀~12杯水 = 1舊水~150ml 98蚊~
呢隻野其實可以做面膜或者滋潤霜~咁我都無乜野講~只係覺得大家都可以試下..我主要用佢黎
介紹下一件產品..
A70 水清新高水份面膜
呢隻野480ml = 65蚊~第一點就係夠平~平過12杯水~第2~其實呢隻效果只係差12杯水小小~
我諗係呢個版度大部分既年紀都係10幾至20幾歲~12杯水對你地甚至我黎講係哂野~根本我地
唔需要咁多水~我地只係有補水就夠架啦~除非你真係乾到乜咁~所以其實呢隻又平又抵~效果只係差
12杯水小小~但係真係平好多同埋好用~如果你去買試下買呢隻睇下效果先啦~
----------------------------------------------
分析沐浴露:
A577 蔗糖特滋潤沐浴露
號稱彩豐行排名第一位既產品~呢隻野我都係冒名去買~我唔理三七廿一買鬼左~因為平呀~21蚊1L~所以連咩味都無聞~
跟住一囉番屋企~哇~洗潔精味~我做左碗碗碟碟了~蔗糖洗潔精味都夠啦~連我朋友都話~係唔係洗潔精黎架~咁算啦~我都
囉黎用啦~話哂佢係第一位喎~用完~無感覺~跟住我即刻講~個排行榜係唔係倒數架~者係其實可能有感覺~我本身用開
dove既~咁所以無得比~21蚊咁既效果應該都ok~但係你要接受到d味囉
dove~好滋潤 滋潤過蔗糖特滋潤沐浴露~但係價錢貴過蔗糖特滋潤沐浴露囉...我唔多介紹 好多人都用過呢隻
A586 西瓜沐浴露
呢隻野1L 25蚊~我搽落身之後有種涼震震既感覺~仲好過個隻蔗糖特滋潤沐浴露~尤其係夏天用~
出完汗跟住涼震震~勁舒服~而且又好平~大家不妨買呢支「消下暑」~
----------------------------------------------
今日既分析結束了~下次再同大家分析產品啦~
(我呀媽叫我帶佢去彩豐行~今日去~去完跟住我又忍唔到手架啦~買完產品用完再推薦啦~88)
(附送一張8月1日買既收據〔之前個張唔見左..〕,證明我唔係打手@@~)
[
本帖最後由 鋒.嵐* 於 10-8-14 09:56 AM 編輯 ]