本帖最後由 evilvampire 於 11-9-12 04:11 PM 編輯
今日中秋節，個月又大又圓。小弟我去左海旁坐坐。係沙灘度，有幾對情侶襯住月色醉人漫步海旁。
而我，只係一個人孤伶伶咁坐左係沙上面，望住個月係海上嘅倒影，諗返起一個個遠在家鄉的朋友…
仲有，我同佢嘅一段已係塵封嘅往事…
小弟我04年因為一隻online game開始上呢個論壇，本來只係玩開一個online game 板，
後期去左第二個板，而呢個板－就係「寫我生活」。
當時身為一個乜都唔知嘅幼稚青年，一開始只係嚮度打屁吹水，睇下其他板友嘅生活苦惱，到後期，亦都加入發言。
就係呢個時候，係呢度認識左「佢」。每次「佢」係我嘅post度留言，我都會好小心好小心咁修飾文筆去回覆。
慢慢，你回我我回你一來一往咁關心慰問後，我地終於交換左MSN。
計起嚟都成5，6年前嘅事啦，傾左D乜都唔記得啦（邊有人記憶咁好呀）。
只係記得每次一放學就等同佢MSN，乜都傾。傾幾耐得幾耐，累都唔去訓。
佢唔回個時又怕佢有事／同第二條仔傾緊。想催佢回又怕佢無禮貌。
你話，男人老狗乜搞到妹妹仔咁呀？！
無計啦。哥哥仔初戀嗎!! 咁緊係緊張D架啦!
發展到後來，我問佢攞埋電話。
記得我初初打俾佢個時，話！ 個心緊張到泵極都無血出咁，唇乾口裂焦燥手震呼吸急。
哇！真係….冷靜唔到呀！記得按最後一個number 之前，都係度諗：打唔打好呢?
最後抱著必死嘅心態，打啦！！！
電話通左，對面有把好柔好柔嘅聲，到左呢一刻我都仲記得個把柔到好似絲質布滑過隻耳仔個種感覺，個一聲柔到不行嘅招呼，「喂! Hi! 」。
我同佢成日煲電話嘅日期開始啦！！ 傾阿媽阿爸點煩，學校D同學點點點，兄弟姐妹點點點…..
個時好開心，同個女仔傾自己野喎，有個人分下自己擔心，煩D乜喎！有個人，佢明白你點諗，同你分享下佢點諗喎！
對比而家返工返學，日日都要笑面迎人，成個傻仔咁。
放左學放左工又無人幫你打氣，第二朝返工返學就又要受氣
真係好想返返個段時光，錄起每一句對話，重溫同佢講過嘅每一句野。
但係可惜，咁係無可能的。
就算俾你重築過去，個份熱情，個份思念，只係得一次，無左就係無左…唔會再有機會返轉頭….
仲記得個時係隻歌「藍鞋子」出街嘅，我同「佢」之間嘅諾言經過種種，真係可以用呢首歌去印證啦。
曲終人就緊係散架啦，去到最尾，因為小弟移民同埋其他生活原因，同「佢」無左聯絡。
而且到左呢一刻，我都唔知點面對「佢」好。
故呢就打完啦。致謝辭點都唔少得嘅！
最後，係度多謝「寫我生活」同呢個論壇＋板友，俾左個咁好嘅回憶我。
同時亦都要多謝「佢」，俾左個咁甜嘅回憶我。
我唔知「佢」會唔會睇到呢個post 或者睇完之後一笑置之，但我都要係度打出嚟，抒發下我嘅情感。
時間不饒人，帶得走嘅野佢都帶走左。幾許風雨，雙方都飽經滄桑。但唯獨呢段回憶，我留左落嚟，將佢放入一個小木箱度，係夜深人靜嘅黑夜，趁空氣中飄住些少淡香夾雜黃色枱燈淡光呢種勾人思緒嘅環境下。我先會慢慢打開箱，追憶一D窩心嘅往事………………
有一首歌好ARM呢種情景:
ZARD-君とのふれあい
http://www.youtube.com/watch?v=qOxWdsrbDGA&feature=related
如同一次遙遠的旅行
就這樣，各自走上了不同的道路
也許我們倆再也見不到了吧?
要說再見了吧?
與你的相遇
最後，小弟祝大家中秋節快樂！小心火災，玩得有得咁安全就咁安全。
P.S. 一年前，我自三年未上水後，再上水個時留左一個打招呼的信息俾佢。一年後，我終於收到回音。回左佢架啦，希望佢都會回返我啦！
四星黃金會員
2011-9-12 16:07#1
本帖最後由 evilvampire 於 11-9-12 04:11 PM 編輯