栩瀅一星新手會員
2012-2-29 01:12#1
本帖最後由 栩瀅 於 12-2-29 01:12 AM 編輯
==============
前言
==============
玩合成唔同玩騎, 玩騎技術好可以一隻打幾隻,
技術需求只係次要, 最重要既係召喚時機.
睇岩時機, 搵岩條路, 邊個出都係一樣.
Well, 可惜最近成日見到,
一係時間唔岩, 一係時間岩又行錯路,
總之, 有心想玩合成既朋友, 有時間睇下以下堆字, 可能會有D幫助.
冇諗住要玩合成既, 都睇下第二章,
唔係話有人出合成就一定要幫, 但起碼自己唔好做連累人地果個.
因為好多字, 唔打算放去主板, 我都預左冇乜幾多人會有心機睇哂 A_A
==============
一章 - 變身奇美拉~
==============
以下用國血時間序, 說明一場國戰中,
玩合成者該有的思考模式, 如何決定應唔應該出合成, 幾時要出及行走路線.
入場前準備:
基本條件應該唔駛點講喇掛, 一行國血+合成獸之血+40水,
如果連點整支合成獸之血都未知既 ._.
本人不建議玩合成, 請先熟習其他召喚獸 ._.
國血第一行:
係~冇錯, 國血未扣夠一行係仲未出到的,
但係有幾個具有決定性既條件, 一入場冇幾耐已經可以睇到.
1. 敵城位置
hey dude, you know? 有D場先天係比較易俾人爆,
亦有時有D位敵方宣得衰, 係對合成好有利.
例如庫山宣左上咁, 貼近水路宣, 原意係等下邊粒水唔駛走上山都可以出到騎.
而果度其實有個位, 宣入兩三步, 係可以出到騎, 但又合成爆唔到的.
但好多人宣得太近水路, 搞到個城凸左出黎, 水路都可以爆到合成,
由於唔駛兜去後山上, 一跳水就爆到, 呢d都係對合成有利既條件.
至於點睇.....可以遊俠隱身埋去, 可以出騎埋去巡, 可以叫其他人幫你睇, 自己諗啦.
庫山只係其中一個例, 其他場自己留意下.
2. 戰線分佈及戰力評估
除左敵城位置, 第二樣可以睇到既就係戰線分佈同戰力評估.
戰線分佈影響合成行走路線, 戰力評估則影響合成以*硬爆*或**偷爆方式炸城.
好多人直覺以為, 前線壓得住既場一定易爆, 其實係唔一定的.
除非係SM到洗人地重生點既SM場, 否則冇話一定壓到.
自從據點加強左火力, 同埋有左車仔之後, 已經少左呢D場.
反而前線夠壓得黎, 洗唔到重生點, 但又岩岩好壓到戰線O係敵城門口,
呢個情況爆城係最難爆, 因為門口成堆人, 一人扑你一下都夠死了,
除非好好彩有人吹你埋城, 唔想博既話, 呢種場合成幫壓殺人比硬沖敵城會更好.
只要前線唔係係敵城門口, 戰線分佈愈集中對合成愈有利.
因為愈集中在地圖其中一邊, 就意味著地圖上某些位置愈少人.
而愈少人則俾人發現既機會愈細, 到發現時已經為時而晚.
小結: 戰線分佈要睇夠唔夠集中, 前線火力要睇夠唔夠力推埋城.
3. 評估集水時間
當睇完敵城位置, 戰線分佈, 而又搵到條有機會既路線, 就可以睇下我方水工既情況,
然後估計一下集時要用幾多時間, 如果少人坐水或者太多人收水, 就早早少少去收定,
有時候, 過左一半就已經要去收水, 當然, 如果實際情況同估計有出入,
未夠一行就已經收夠40水, 呢個時候可以睇下有冇人要用水,
可以拎返部份水出黎, 俾其他人出召擴建, 自己拎多少少貢之餘,
又唔駛搞到人地冇水用, 總比hold住40水呆等好.
國血第二行:
過左第一行國血之後，就可以準備隨時召奇美拉。
基本行走路線係第一行既時候，應該已有定數，呢個時候就要留意以下幾方面，以決定召喚時機，同埋應該用黎壓線定爆城。
1.敵我雙方召喚
首先最基本的，係睇雙方騎士各自數目多少。以我個人定義，一方有五隻騎以上先算係多。而騎士數目係決定炸城定壓線既關鍵，因為騎士數目直接影響合成被發現的機率，同埋被發現後的存活時間。 簡單而言，壓線合成要夠長命，炸城合成愈遲俾人見到，成功機會愈高。 大致上, 只有兩個情況適合用黎壓線, 一係敵人冇騎, 二係我方有好多騎士, 足以秒殺敵方滿血騎.
很遺憾地, 日台服國戰騎士數平均都是四到五隻, 而港服平均只有兩至三隻. 兩三隻對兩三隻的情況下, 大家都秒唔到對方騎士, 結果就係敵騎唔要命的同合成換血, 每隻大插你兩下, 合成可以收皮了. 港服合成岩用黎壓線既場, 我估計大概不到20%, 可能連10%都沒有.
除左騎士, 同時亦應該留意敵我雙方有冇巨人同死靈.
因為有其他召喚在場, 騎士會集中去哂打召. 注意呢點, 就可以避免同敵騎迎面相撞, 或者特登叫人出巨人, 引走敵騎.
而死靈既存在, 對前線變化影響可以好大, 所以要更加留意.
例如見到前線推得好接近敵城, 咁就要留意下係咪因為有死靈係前線先推到咁前.
如果只係靠死靈先推到咁近, 即係代表死靈一玩完, 前線就會大退.
如果冇死靈都推到咁近, 則可以考慮配合死靈一齊推埋城硬爆.
2.國血差距
我諗可能比較少人留意, 國血差距其實亦都有少少影響合成應該壓線定炸城.
贏緊國血既場,當然壓線或炸城都可以, 但係輸國血既場, 就要視乎輸幾多.
情況一. 平血或者輸少於半行
除非確定對方主水已死, 而副水偏遠, 唔易爆騎.
否則不建議為壓線而出合成, 因為會引致敵方大量爆騎, 下一隻合成就難玩了.
情況二. 輸大半行國血
不建議用合成壓線, 只要你諗下要拆幾多支方尖, 先追得返果大半行, 而隻合成又要有幾長命, 先幫到人拆咁多支方尖, 你就會知點解.
其實輸得大半行, 都應該就快輸到出龍, 除非遇著好好既機會, 好有把握可以炸到城, 否則都係等埋有龍先出合成.
3.預測戰線變化
好簡單, 即係睇下地圖, 有冇一堆人仔沖緊去某一個方向, 而我方有冇足夠人仔去頂, 從而判斷戰線將會推前定退後, 會唔會影響合成原定路線. 呢方面絕對係講求國戰經驗, 同平時打國戰有冇睇開地圖有關. So, 想玩合成既, 平時練習下睇多d地圖.
國血第三行:
去到第三行既時候可以出第二隻合成, 如果第一隻已經解左, 咁當然冇問題,
但係假如第一隻出緊又未解, 咁應該點呢?
1. 第一隻合成去緊炸城
假如你係第一隻合成, 解左或者死左, 都應該報一報頻, 等第二隻可以即刻出.
假如你係準備出第二隻合成, 留意敵軍情報(即係 xxx 擊倒 yyy), 因為第一隻俾人ko既時候可能黎唔切出頻.
2. 第一隻合成壓緊線
假如你係第一隻合成壓緊線, 而有人要出第二隻合成, 可以問下係咪去炸城, 如果係炸城就應該早d解召俾人出, 俾多d時間第二隻合成去行.
如果第二隻都係用黎壓線, 就視乎自身血量同主城去前線既距離有幾遠而決定幾時解.
假如你係準備出第二隻合成, 就講清楚係壓線定炸城用.
奇美拉操作技巧:
1. 技能應用
冰火雷三招唔多講, 有玩過法師既玩家, 大概都知道應該幾時用. 唯獨係一技拍地打飛技較難, 其實呢招我好少用, 因為硬直大, 拍走近身既同時企定定俾遠攻係咁射, 拍一下分分數鐘冇左一千血.多數情況我都係用冰技, 定住敵人保持距離, 繞過再埋城.
2. 報頻
巨集F1~F5最常用到第一同第二句, 第三同第四句比較少用,詳細設定及用法如下:
F1.報位置同血量
用黎表示我方已經出左合成, 暗示其他人作出相對配合. 沒錯, 只係有暗示作用. 有需要既時候, 要人手打字表示合成即將行走既路線, 同叫人唔好引敵過黎.
F2.表示就到敵城, 要求我方停殺
通常我會去到敵城附近兩格距離左右先開始出呢句, 因為重生時間大概夠合成行兩格.
F3.報位置及要求步兵增援
SET左但係少用, well,因為......港服玩家好多時都唔會理你, 叫同唔叫冇乜分別, 會幫手既會自己跟黎, 唔會幫手既叫佢都唔會郁.
F4.報位置及要求騎士增援
呢個都少用, 原因同叫步兵增援情況唔同, 多數騎士真係會過黎, 但係好多時都唔多幫到手, 因為本身騎士數唔夠多, 只有一兩隻騎既話, 我多數都唔會叫騎黎, 避免秒唔到敵騎之餘, 仲幫人地解冰.
F5.提示不要過早破冰
頭一兩年玩合成既時候, 我都冇set呢句的, 但係呢半年我真係頂唔住先加左. 唔知係咪因為改版冰法大冰改成四秒之後, 大家都直覺以為冰條好快會溶, 於是好心急咁就一野打埋去. 其實合成大冰我印象中係冇改過的, 可能有我唔知, 但一定比冰得比冰法耐. 日版fez wiki話有16秒, 港版我覺得冇咁耐, 不過都大概都有十秒八秒左右. 通常有d我唔識既人仔或騎同我一齊行既時候, 冰完之後我就會出呢句.