我都抽小小時間打返篇文先,在此首先要多謝GM08,公測近一年以來,在虛寶上的不斷支援和提供遊戲攻略資料。講真果句,當初無諗過會玩K1,因為小弟玩格鬥game係最屎,出拳收拳~幾時跳~幾時格擋都係慢幾拍。港漫角色更加係知D唔知D,龍虎門剩係識王小龍王小虎,因為之前中華英雄OL出過龍虎門資料片,其餘什麼車寶山、火雲邪神一律唔識,還有旺角前一個車站-太子。一個唔係港漫fans又唔係鐘意格鬥Game的人,會玩K1真係幾出奇。
特別要多謝一位已經離開K1好耐的朋友(太耐了忘了名稱),好主動日日搵我入去打幾RD練身手,但多數都係比人打死,印象好似未試過打贏添...還有一位細細粒,經常帶埋幫會d人入活動房玩,每個星期起碼有得寫活動搞成點,唔駛R爆頭「老作」。仲有好多願意抽半粒鐘時間企定定做訪問的玩家,要忍受小弟間歇性彈game...
後尾聽聞接著更新會出九龍城寨,心血來潮買下人生第一本港漫,還記得創刊號送洛軍人物卡,好似接住第二期送專用武器(唔多記得),但又好唔好彩!本創刊號起公司唔見左,仲諗住開始慢慢儲,買到大老闆殺入九龍城寨同洛軍鬥P就無再買了,原因係好難買到!7仔OK唔駛半日已經無貸,最後要上國內漫畫網睇返先順利睇完。
K1比人感覺係與別不同,出面十隻~有九隻打機一上線,唔係做任務就趕住組團打副本。K1一上線就好似欠人周身債,唔駛幾秒就掉你入房切磋,其餘時間就係吹水較多。整套遊戲就係咁簡單,不斷同人打打打,學下點出招點攻點守,嬴輸真係九成九睇自己技術去到咩層次。
到最後K1係咪算係一款成功的港產遊戲,從人流同人氣等等表面數據上~遠遠比不上其他RPG,但係2000fun又好神奇地營造出一個資深+死忠Fans的集中營。唔係刻意擦各位的鞋,睇返官方其他無乜人再玩的遊戲,放acc的post佔成個板有多,而我見到的K1討論區真係有班有心的玩家講緊Game入面的大小事,剩係臨別秋波的近幾個月,還會不斷回覆關心和不想遊戲執凹,剩係依份人情味~出面好難搵得到!
MMORPG執凹,失去的頂多是虛幣神裝點數和等級
但K1執凹
卻失去各位多年來苦練的心血
每一拳一腿都經過深思熟慮
數千場的比試
漫長的試鍊
每一場勝敗背後都有著唔同的歷史
唔同人的故事